"Anthropic" şirkəti özünün "Claude" süni intellekt modelinin imkanlarını genişləndirərək onu şəxsi istifadə üçün nəzərdə tutulmuş tətbiqlərə inteqrasiya edib. Əvvəllər yalnız "Microsoft" kimi işgüzar platformaları dəstəkləyən sistem, artıq "Spotify", "Uber", "Audible", "AllTrails", "TripAdvisor", "Instacart" və "TurboTax" kimi populyar xidmətlərlə birbaşa əlaqə qura bilir.
Bu yenilik sayəsində "Claude" istifadəçilərlə söhbət əsnasında uyğun tətbiqləri avtomatik olaraq təklif edəcək. Məsələn, dağ gəzintisi barədə məsləhət istədikdə sistem "AllTrails" xidmətini önərərək prosesi asanlaşdırır. Qeyd edək ki, "OpenAI" şirkətinin "ChatGPT" modeli də "Spotify" kimi bəzi platformalarla oxşar inteqrasiyaya malikdir.
Məxfilik məsələlərinə toxunan "Anthropic" rəsmiləri bildirirlər ki, qoşulmuş tətbiqlərdən əldə edilən məlumatlar süni intellekt modellərinin təlimində istifadə olunmur. Həmçinin, üçüncü tərəf proqramları istifadəçinin "Claude" ilə olan digər yazışmalarını görə bilmir. Sistemdə heç bir ödənişli reklam və ya sponsorlu cavablar yer almır, nəticələr isə yalnız faydalılıq dərəcəsinə görə sıralanır. Hər hansı bir alış-veriş və ya rezervasiya etməzdən əvvəl isə istifadəçidən mütləq təsdiq tələb olunur.
Yeni qoşulma funksiyaları hazırda bütün "Claude" abunə planlarında aktivdir. Bu imkandan yararlanmaq istəyən istifadəçilər yan paneldə yerləşən "fərdiləşdirmə" bölməsinə daxil olaraq "qoşulmalar" menyusundan istədikləri tətbiqləri seçib əlavə edə bilərlər. İnteqrasiya edilmiş xidmətləri istənilən vaxt ləğv etmək mümkündür.
