Altı ilə yaxın müddət, çoxsaylı yeniləmələr və 40 milyon nüsxəlik satış göstəricisindən sonra "Cyberpunk 2077" layihəsi "CD Projekt Red" üçün böyük uğura çevrilib. Lakin 2020-ci ilin dekabrında oyunun bazara çıxarıldığı dövrdə vəziyyət tamamilə fərqli idi. O dövrdə oyun xüsusilə konsollardakı texniki nasazlıqlara görə kəskin tənqid olunmuş, hətta "PlayStation Store"-dan müvəqqəti olaraq çıxarılmışdı.
Bu qərarın arxasında hansı səbəblər dayanırdı?
"CD Projekt Red"-in həm-rəhbəri Mixal Novakovski "The Game Business"-ə verdiyi müsahibədə oyunun yarımçıq vəziyyətdə buraxılmasının səhv olduğunu açıq şəkildə etiraf edib. Onun sözlərinə görə, bu qərarın arxasında heç bir kənar investor təzyiqi yox idi, lakin daxili çətinliklər kifayət qədər çox idi. Novakovski qeyd edib ki, COVID-19 pandemiyasının yaratdığı fəsadlar, komandanın uzunmüddətli iş prosesindən yorulması və layihəni tamamlamaq üçün yaranan psixoloji təzyiq bu nəticəyə gətirib çıxarıb.
Gələcək planlar nədən ibarətdir?
Dörd il yarım davam edən dəstək və yüksək qiymətləndirilən "Phantom Liberty" əlavəsindən sonra studiya oyunçuların etimadını qismən bərpa edə bilib. Hazırda "CD Projekt Red" növbəti layihə olan "Cyberpunk 2" üzərində işləyir. Şirkət rəhbərliyi keçmiş səhvlərdən dərs çıxararaq gələcək oyunların keyfiyyətinə daha çox diqqət yetirəcəklərini vurğulayır.
