"Take-Two Interactive" şirkətinin baş icraçı direktoru Ştraus Zelnik (Strauss Zelnick) "Game File" nəşrinə müsahibəsində "BioShock 4" şuterinin növbəti hissəsinin uzun çəkən intizarını şərh edib. Jurnalist Stiven Totilonun (Stephen Totilo) oyunun inkişafının bu qədər uzun sürməsinə təəccüblənib-təəccüblənməməsi ilə bağlı sualına o, mənfi cavab verərək, vəziyyətdən dərindən məyus olduğunu bildirib. Qeyd edək ki, "2K" nəşriyyatına məxsus "Cloud Chamber" studiyası tərəfindən hazırlanan yeni oyun on ildən çoxdur ki, istehsal mərhələsindədir və ötən yay yenidən işlənməyə göndərilib.
Layihənin yaradıcı böhranı barədə danışan Ştraus Zelnik doğru istiqaməti tapmağın heç də asan olmadığını vurğulayıb. O, "Geri dönüb baxdıqda, bizi dalana dirəyən ideyaların arxasınca qaçaraq çoxlu vaxt və pul xərclədiyimizi görürük", – deyə şikayətlənib. Buna baxmayaraq, şirkət rəhbəri hazırkı vəziyyətə daha nikbin yanaşır. Onun sözlərinə görə, hazırda əllərində yaxşı bir oyun var, lakin əsas məqsəd mükəmməl bir məhsul buraxmaqdır və bu yolda studiya rəhbərliyi ilə sıx əməkdaşlıq edilir.
Məlumata görə, "BioShock 4" layihəsini istehsal cəhənnəmindən xilas etmək "Diablo" franşizasının sabiq rəhbəri Rod Ferqyussona (Rod Fergusson) həvalə olunub. Xatırladaq ki, o, vaxtilə "BioShock Infinite" oyununun da buraxılış səviyyəsinə çatdırılmasına böyük köməklik göstərmişdi.
Yeni layihə, seriyanın vizyoneri Ken Levinin (Ken Levine) üzərində işlədiyi və 2013-cü ildə işıq üzü görən "BioShock Infinite"dən sonra ilk yeni oyun olacaq. Hazırda Ken Levinin yeni komandası "Judas" adlı süjetli şuter üzərində çalışır, lakin bu layihənin də buraxılışı hələlik tələsmir.
