Texnologiya nəhəngi Asus, istifadəçilərin iş səmərəliliyini artırmaq üçün nəzərdə tutulan "ROG Strix XG129C" adlı yeni köməkçi monitorunu satışa çıxarıb. 12,3 düymlük sensor IPS paneli ilə təchiz olunan bu cihaz, 1920 × 720 piksel təsvir ölçüsünə və 24:9 ekran nisbətinə malikdir. Monitor 300 kd/m2 parlaqlıq, 1200:1 kontrast nisbəti və 75 Hz yeniləmə tezliyi ilə yüksək görüntü keyfiyyəti vəd edir.
Cihazın texniki imkanları rəng dəqiqliyi ilə də diqqət çəkir: sRGB rəng məkanının 125%, DCI-P3-ün isə 90% əhatə dairəsi təmin edilir. Asus dəstə ilə birlikdə kompüterin vəziyyətini izləmək üçün "AIDA64 Extreme" proqramına bir illik abunəlik də təqdim edir. Bundan əlavə, iki ədəd "ROG SensorPanel" interfeysi vasitəsilə monitoru tamhüquqlu sistem monitorinq panelinə çevirmək mümkündür.
Monitorun qoşulma və enerji təchizatı imkanları da kifayət qədər genişdir. Cihaz məlumat ötürülməsi və video görüntüləmə üçün USB-C portundan istifadə edir, ikinci USB-C portu isə 20 Vt gücündə enerji ötürmə qabiliyyətinə malikdir. Əlavə uyğunluq üçün HDMI 1.2 girişi də mövcuddur. Cəmi 6,3 mm qalınlığında olan bu displey, daxili dayağı və ştativ üçün nəzərdə tutulmuş xüsusi girişləri sayəsində istənilən iş masasına rahatlıqla inteqrasiya olunur.
Hazırda Almaniya, Avstriya və İsveçrə bazarlarında satışa çıxarılan "ROG Strix XG129C" modelinin qiyməti 240 avro təşkil edir.
