Fransız nəşriyyatçısı və tərtibatçısı "Ubisoft", açıq dünyalı pirat döyüş oyununun remeyki olan "Assassin’s Creed Black Flag Resynced" üçün apardığı reklam kampaniyasının bəhrəsini görür. "GamesRadar" portalının məlumatına görə, şirkətin yeni hesabatında maliyyə direktoru Frederik Düge (Frederick Duguet) oyunun buraxılışdan əvvəlki uğurlarından danışıb. O qeyd edib ki, "Ubisoft" remeykə olan tələbat səviyyəsindən çox məmnundur və ilk üç həftə ərzindəki ön sifarişlər françayz tarixindəki ən güclü göstəricilər sırasındadır.
Frederik Düge oyunun gələcək perspektivləri barədə nikbinliyini ifadə edərək deyib:
"Biz şadıq və əminik ki, 'Black Flag Resynced' çox uğurlu bir 'Assassin's Creed' olacaq, çünki bu, orijinal təcrübənin etibarlı, eyni zamanda böyük ölçüdə təkmilləşdirilmiş versiyasıdır. İlk təqdimatda oyunçular onu çox bəyəndilər."
Maliyyə direktoru həmçinin vurğulayıb ki, yeni remeyk tam qiymətə satılmır. Belə ki, "Assassin’s Creed Shadows" kimi 70 ABŞ dolları deyil, 60 ABŞ dolları müqabilində təklif olunur. Baxmayaraq ki, bir çox iri büdcəli oyunlar hələ də bu qiymətə satılır, şirkət bu addımı ilə daha geniş istifadəçi kütləsini cəlb etməyi hədəfləyir.
Remeyk "Anvil" mühərriyinin ən son versiyası üzərində sıfırdan yaradılır. Tərtibatçılar şüa izləmə (raytracing), yenilənmiş su simulyasiyası, dinamik döyüşlər, təkmilləşdirilmiş gizlilik və parkur mexanikaları, eləcə də yeni süjet səhnələri vəd edirlər. "Assassin’s Creed Black Flag Resynced" 9 iyul tarixində fərdi kompyuterlər ("Steam", "Epic Games Store", "Ubisoft Connect"), "PS5", "Xbox Series X" və "S" platformaları üçün buraxılacaq. Oyunun sistem tələbləri artıq məlumdur.
