"Apple" şirkətində rəhbərlik dəyişikliyi ərəfəsində strateji prioritetlərin yenidən nəzərdən keçirildiyi bildirilir. Hazırkı baş direktor Tim Kuk-un vəzifəsini 1 sentyabr tarixində Con Ternus-a təhvil verməsi ilə şirkətin idarəetmə üslubunda ciddi dəyişikliklər gözlənilir. Bloomberg-in analitiki Mark Qurman-ın məlumatına görə, Ternus-un rəhbərliyi altında dizaynerlərin məhsul strategiyasına təsiri yenidən bərpa olunacaq.
Nə üçün dizayn qrupunun rolu azalmışdı?
Son on ildə "Apple" bir çox istedadlı dizaynerini, o cümlədən dizayn şöbəsinin keçmiş rəhbəri Coni Ayv-ı itirib. Stiv Cobs-un dövründə Ayv şirkətin əməliyyat fəaliyyətinə və məhsul xəttinə ən çox təsir edən şəxs idi. Lakin Ceff Uilyams-ın rəhbərliyi altında aparılan restrukturizasiyadan sonra dizayn qrupunun strateji qərarlardakı nüfuzu zəifləmiş və bu funksiyalar idarəetmə komandasının digər üzvləri arasında bölünmüşdü.
Con Ternus dizayn sahəsinə necə yanaşır?
Con Ternus artıq yeni vəzifəsinə hazırlaşmaq üçün sənaye dizaynı qrupu ilə sıx əməkdaşlıq edir. Onun fikrincə, "Apple" məhsulları istehlakçıların sahib olduğu ən estetik cihazlar olaraq qalmalıdır. Ternus-un rəhbərliyi dövründə şirkətin ilk qatlana bilən "iPhone" modelinin anons edilməsi və məhsulun hazırlanması prosesində dizaynerlərin daha aktiv iştirakı gözlənilir.
