"Bloomberg" agentliyinin məlumatına görə, "Apple" özünün "Vision Pro" və "Siri" komandalarında ciddi struktur dəyişiklikləri həyata keçirir. İxtisarlar nəticəsində "Vision Pro" üçün oyunlar hazırlayan komanda demək olar ki, tamamilə bağlanıb, immersiv kontent yaradan şöbənin isə ölçüsü kiçildilib. Ümumilikdə 200-dən çox iş yeri ləğv edilib.
Şirkət rəsmi açıqlamasında bu addımı istifadəçilərə ən yaxşı təcrübəni təqdim etmək üçün biznesin təkamülü kimi qiymətləndirib. "Apple" nümayəndələri yeni vakansiyaların yaradılacağını bildirsələr də, mövcud ixtisarların miqyası diqqət çəkir. "Vision Pro" qarnituru 2024-cü ilin əvvəlində 3499 ABŞ dolları qiyməti ilə bazara çıxarılsa da, gözlənilən kommersiya uğurunu qazanmaqda çətinlik çəkir.
"Apple" gələcəkdə hansı addımları atacaq?
Hazırda "Apple"-ın daha yüngül və nazik qarnitur üzərində işlədiyi bildirilsə də, giriş səviyyəli XR cihazları üçün "Samsung Display" ilə əməkdaşlığın dayandırıldığı barədə məlumatlar var. Şirkətin diqqətini "Meta"-nın ağıllı eynəklərinin uğurundan sonra öz ağıllı eynəklərini hazırlamağa yönəltdiyi iddia edilir. Bu yeni məhsulun 2027-ci ildə "WWDC" tədbirində təqdim olunması planlaşdırılır.
Digər tərəfdən, "Apple" bu ilki "WWDC"-də süni intellektlə təchiz edilmiş yenilənmiş "Siri"-ni təqdim edib. Yeni funksionallığa malik "Siri"-nin ictimai beta versiyasının ilin sonuna qədər istifadəyə verilməsi gözlənilir.
