"Google" şirkəti "Android" istifadəçiləri üçün cihazlararası sinxronizasiyanı asanlaşdıran yeni xüsusiyyət üzərində işləyir. "Apple" şirkətinin məşhur "Handoff" funksiyasına bənzəyən bu yenilik sayəsində istifadəçilər "Android" smartfonlarında başladıqları hər hansı bir işi uyğun planşetdə qaldığı yerdən davam etdirə biləcəklər.
"Continue On" adlanan bu funksiya gələcəkdə ikitərəfli işləmək üçün nəzərdə tutulsa da, ilkin mərhələdə yalnız smartfondan planşetə məlumat ötürülməsini dəstəkləyəcək. "Android" planşet sahibləri ekranın alt panelində telefonlarında ən son istifadə etdikləri tətbiqi təklif edən xüsusi "Continue On" ikonunu görəcəklər. Bunun üçün həmin proqramın planşetdə də quraşdırılması mütləqdir. Bu sistem istifadəçilərə üzərində işlədikləri sənədləri və ya yenicə açdıqları e-poçtları birbaşa ekrana gətirməyə imkan verəcək. Bəzi hallarda isə tapşırığı veb üzərindən davam etdirmək üçün planşetin brauzerində ən uyğun səhifə açılacaq.
"Google" nümayəndələrinin sözlərinə görə, yeni funksiya "Android 17" əməliyyat sisteminin ilk buraxılış namizədi olan RC1 versiyasında test üçün əlçatan olacaq. Lakin bu versiyanın nə vaxt təqdim ediləcəyi və planşetdən smartfona keçidin nə zaman aktivləşəcəyi hələlik açıqlanmayıb. Ötən həftə elan edilmiş "Android" əsaslı "Googlebook" noutbukları ilə birlikdə bu yenilik, "Apple" ekosisteminin cihazlararası koordinasiyasına rəqib ola biləcək daha geniş "Android" uyğunluğuna yol açır.
