"AMD" şirkətinin birinci rüb üzrə maliyyə nəticələri analitiklərin gözləntilərini üstələyib. Şirkətin ümumi gəliri 38% artaraq 10,3 milyard ABŞ dollarına, server seqmentindəki gəliri isə 57% artaraq 5,8 milyard ABŞ dollarına çatıb. İkinci rüb üçün 11,2 milyard ABŞ dolları həcmində nikbin gəlir proqnozu fonunda, ABŞ-da birja hərracları bağlandıqdan sonra "AMD" səhmləri 15% bahalaşıb.
Bununla belə, rüblük müqayisədə bəzi göstəricilərdə geriləmə qeydə alınıb. İllik kəsimdə xalis mənfəət demək olar ki, iki dəfə artaraq 1,38 milyard ABŞ dolları təşkil etsə də, əvvəlki rüblə müqayisədə 8% azalıb. Əməliyyat xərcləri 34% artaraq 3,94 milyard ABŞ dollarına yüksəlib. Əməliyyat mənfəəti isə illik bazada 83% artaraq 1,48 milyard ABŞ dolları olub.
Gələcək hədəflər və bazar proqnozları nədən ibarətdir?
"AMD" şirkətinin baş direktoru Liza Su (Lisa Su) məlumat mərkəzləri seqmentinin əsas böyümə drayveri olduğunu bildirib.
"İrəliyə baxaraq, tələbatı ödəmək üçün tədarükləri artırdıqca server seqmentində böyümənin əhəmiyyətli dərəcədə sürətlənəcəyini gözləyirik", - deyə o vurğulayıb.Şirkət 2030-cu ilə qədər server prosessorları bazarının həcminin 120 milyard ABŞ dollarına çatacağını və hər il 35% böyüyəcəyini proqnozlaşdırır.
Hazırda "AMD" çip istehsalı və qablaşdırılması imkanlarını genişləndirmək üçün "TSMC" və "GlobalFoundries" ilə sıx əməkdaşlıq edir. Həmçinin, "Samsung" şirkəti ilə birlikdə "Instinct MI455X" sürətləndiriciləri üçün HBM4 yaddaşı və altıncı nəsil "EPYC" (şərti adı "Venice") prosessorları üçün qabaqcıl DRAM növləri yaradılacaq. Yeni prosessorların tədarükünə bu ilin sonuna qədər başlanması planlaşdırılır.
Fərdi kompyuter və oyun seqmentində vəziyyət necədir?
Server bazarındakı genişlənmə fərdi kompyuter (PC) seqmentinə təsirsiz ötüşməyəcək. Yaddaş və digər ehtiyat hissələrinin qiymət artımı səbəbindən ilin ikinci yarısında PC komponentlərinin tədarükü azaldılacaq. Buna baxmayaraq, birinci rübdə müştəri və oyun həlləri seqmentində ümumi gəlir 23% artaraq 3,6 milyard ABŞ dollarına çatıb.
Təkcə müştəri seqmenti illik müqayisədə 26% artımla 2,9 milyard ABŞ dolları gəlir gətirib. Oyun seqmentində isə gəlirlər 17% artaraq 0,7 milyard ABŞ dolları təşkil edib. Lakin "AMD" rəhbərliyi ilin ikinci yarısında oyun seqmentindəki gəlirlərin birinci yarıya nisbətən 20%-dən çox azalacağını gözləyir. Quraşdırılmış həllər seqmentində isə gəlir 6% artaraq 873 milyon ABŞ dolları olub.
