"Amazon" şirkəti cümə günü "Amazon Luna" bulud oyun xidmətində oyunçuların üçüncü tərəf oyunları və abunəlikləri almasının qarşısını alacaq böyük bir dəyişiklik elan edib. 10 iyun 2026-cı il tarixindən etibarən əvvəllər alınmış oyunlar platformadan silinəcək. Lakin istifadəçilər bu oyunları satın alarkən istifadə etdikləri "EA", "GOG" və ya "Ubisoft" hesabları vasitəsilə digər platformalarda oynamağa davam edə biləcəklər.
"Amazon Luna" platformasında nələr dəyişir?
Bu dəyişikliklərə uyğun olaraq, "Amazon Luna" artıq "EA", "Ubisoft" və ya "GOG" mağazalarını dəstəkləməyəcək. Həmçinin, "Ubisoft Plus" və "Jackbox Games" abunəlikləri dayandırılır və aktiv abunəliklər hesablama dövrünün sonunda ləğv ediləcək. Platforma 3 iyun tarixindən etibarən "Öz Kitabxananı Gətir" funksiyasını da ləğv edir. Şirkətdən verilən məlumata görə, üçüncü tərəf oyunları üçün heç bir ödəniş geri qaytarılmayacaq.
İstifadəçiləri hansı məhdudiyyətlər gözləyir?
Qeyd edək ki, "Amazon Luna" 2020-ci ildə "Xbox Cloud Gaming" və artıq fəaliyyətini dayandırmış "Google Stadia" xidmətlərinə rəqib olaraq yaradılıb. Platforma istifadəçilərə fərdi kompüter, mobil telefon və ya smart televizorlar vasitəsilə müxtəlif oyunları yayımlamaq imkanı verir. 2023-cü ildə xidmətə fərdi oyunların satın alınması funksiyası əlavə edilmişdi.
Abunəlik planları necə işləyəcək?
Son yeniləmə istifadəçilərin yalnız öz abunəliklərinə daxil olan oyunları oynamasına imkan verəcək. 14,99 ABŞ dolları dəyərindəki "Amazon Prime" abunəliyinə daxil olan "Luna Standard" planı istifadəçilərə "EA Sports FC 26", "Hogwarts Legacy", "Skyrim" və "Death Stranding" kimi oyunlar təklif edir. Aylıq 9,99 ABŞ dolları ödəniş tələb edən "Luna Premium" isə "Alien: Isolation", "Borderlands 3" və "Sonic Frontiers" kimi oyunları ehtiva edən daha geniş kitabxanaya malikdir.
"Amazon Luna" sözçüsü Brittney Hefner "The Verge" nəşrinə göndərdiyi elektron məktubda bildirib ki, xidmət müştərilər üçün uzun vədədə daha yaxşı işləyəcəyinə inandıqları yanaşmaların xeyrinə bəzi abunəlik və oyun mağazası modellərindən imtina edir. Hefner əlavə edib ki, "Amazon" abunəlik vasitəsilə əlçatan olan güclü üçüncü tərəf oyunları da daxil olmaqla, geniş çeşidli oyun təcrübələrinə sərmayə qoymağa davam edəcək.
