"Bits und Bolts" adlı "YouTube" kanalının müəllifi köhnə "S3 Virge DX 4MB" videokartının işində maraqlı bir detal aşkar edib. Məlum olub ki, istehsalçı qara rəngi qəsdən tünd boz kimi nümayiş etdirib. Bu addım "NTSC" standartına uyğun olaraq, elektron-şüa borulu (CRT) monitorlarda tünd sahələrin həddindən artıq qara görünməməsi üçün atılıb. Süni işıqlandırma prosesinə xüsusi "qara səviyyənin qaldırılması biti" (pedestal bit) cavabdeh olub. Proqram təminatı tərəfindən təyin edilmiş rəngin dəyəri 3F olub və bu bit sıfırlanarkən dəyər 1F-ə düşüb.
Bu parametri dəyişdirmək qərarına gələn entuziast, sazlayıcı (debugger) proqramı açaraq hədəf ünvanları izləməyə başlayıb. O, "Windows" əməliyyat sisteminin "Kalkulyator" tətbiqindən istifadə edərək onaltılıq say sistemini ikiliyə çevirib və lazımi biti axtarıb. Axtarışlar nəticəsində həmin bitin "3c4" ünvanında yerləşdiyi müəyyən edilib. Bu ünvandakı dəyər sıfıra dəyişdirildikdə ekranın fonu tam qara rəngə bürünüb. Tədqiqatçı ilkin dəyəri qaytararaq, redaktə edilmiş səkkiz bitdən birinin məhz qara səviyyənin qaldırılmasına cavabdeh olduğunu təsdiqləyib.
Yekun mərhələdə VBIOS fayl formatına çevrilib və koddakı dəyişikliklər birbaşa videokartın yaddaşına yazılıb. Assemler kodunda iki uyğunluq tapan müəllif, onaltılıq qeydi "20"-dən "00"-a dəyişib. Sistemin yeni proqram təminatını zədələnmiş kimi rədd etməməsi üçün VBIOS-un yoxlama cəmi (checksum) yenidən hesablanıb. Köhnə "77" dəyəri yeni "97" dəyəri ilə əvəz edilib. Uğurla redaktə olunmuş VBIOS çipə yazılaraq videokartdakı orijinal çiplə əvəzlənib və ilk yüklənmədə qara rəng tamamilə təbii görünüşünü alıb.
