“Tesla” şirkəti Fremont zavodunda “Model S” və “Model X” avtomobillərinin istehsalını dayandıraraq, həmin sahəni “Optimus” insanabənzər robotlarının istehsalı üçün yenidən qurub. Şirkət tərəfindən yayımlanan videoda istehsal xətlərinin, o cümlədən robotlaşdırılmış manipulyatorların və konveyerlərin sökülməsi prosesi əks olunub. Ağır texnikadan istifadə edilərək beton özüllərin belə söküldüyü bu genişmiqyaslı işlər cəmi 46 gün ərzində yekunlaşıb.
Nə üçün bu istehsal xətti ləğv edildi?
Bu qərar 2025-ci ilin dördüncü rübünün maliyyə hesabatı zamanı açıqlanmışdı. Şirkətin baş direktoru İlon Mask 2026-cı ilin yanvarında flaqman modellərin istehsalının dayandırılacağını elan etmişdi. Aprel ayının əvvəlində sifarişlərin qəbulu dayandırılıb, may ayının əvvəlində isə sonuncu avtomobillər konveyerdən çıxıb. 20 may tarixində keçirilən xüsusi mərasimlə bu modellərin istehsal dövrünə rəsmi olaraq yekun vurulub.
“Optimus” robotlarının istehsalı necə olacaq?
İlon Mask yeni istehsal xəttinin illik 1 milyon ədəd robot gücünə çatacağını hədəflədiyini bildirib. Lakin o, “X” sosial şəbəkəsindəki paylaşımında istehsalın ilkin mərhələdə çox yavaş olacağını vurğulayıb. Maskın sözlərinə görə, robot istehsalı avtomobil istehsalından tamamilə fərqli və daha mürəkkəb bir proses olduğu üçün sürətli artım gözlənilmir.
