Kolleksiyaçılar üçün böyük maraq kəsb edən “Super Mario Bros.” oyununun bu nüsxəsi “Heritage Auctions” tərəfindən keçirilən hərracda 3 milyon ABŞ dolları məbləğində rekord qiymətə satılıb. Bu nəticə 2021-ci ildə eyni oyunun başqa bir nüsxəsi üçün ödənilən 2 milyon ABŞ dolları məbləğindəki əvvəlki rekordu ciddi şəkildə üstələyib. Sözügedən satış, “Super Mario 64” oyununun 1,56 milyon ABŞ dollarına satıldığı mübahisəli hərracdan qısa müddət sonra baş tutub.
Oyunun qiymətinin bu qədər yüksək olmasının əsas səbəbi onun nadir qablaşdırma xüsusiyyətidir. “Heritage Auctions”-ın məlumatına görə, 1985-ci ilin ikinci buraxılışı olan bu nüsxə sellofan örtük əvəzinə, qısa müddət sonra istehsalı dayandırılan parlaq stikerlə möhürlənib. Ekspertlər bunun dünyada mövcud olan ən erkən möhürlənmiş nüsxə olduğunu bildirirlər və “Professional Sports Authenticator” tərəfindən oyuna 9.6 A++ dərəcəsi verilib.
Köhnə oyun kolleksiyalarının qiyməti son illərdə sürətlə artmaqdadır. Müqayisə üçün qeyd edək ki, hələ 2020-ci ilin iyul ayında “Heritage Auctions”-da satılan başqa bir “Super Mario Bros.” nüsxəsi 114 min ABŞ dolları ilə rekord qırmışdı. İndiki satış qiyməti ilə müqayisədə, cəmi bir neçə il əvvəlki bu rəqəm artıq olduqca ucuz görünür. Hərracın qalibi oyunu açmaq qərarına gələrsə, hərrac evi ona hədiyyə olaraq “NES” konsolu da təqdim edəcək.
