"Samsung" şirkəti özünün ən böyük rəqibi olan "Apple"-a qarşı növbəti istehzalı reklam kampaniyasına start verib. Şirkətin yeni reklam çarxında "Tim Cook" adlı şəxs "Galaxy Z Fold 8" smartfonunu təqdim edərək, "gələcək buradadır" ifadəsini işlədir. Qeyd edək ki, bu şəxs "Apple"-ın icraçı direktoru deyil, sadəcə onunla eyni ada və bənzər xarici görünüşə malik olan Yeni Zelandiya sakini Tim Cook-dur.
Bu reklam çarxı "Apple"-ın "iPhone Duo" təqdimatı ilə eyni vaxta təsadüf edir və şirkətin məşhur kinematoqrafik təqdimat videolarını təqlid edir. Samsung bununla kifayətlənməyərək, Tim Cook-un yenilənmiş profil şəklinə də eyham vuraraq rəqibinə qarşı yumoristik yanaşmasını davam etdirib. Bu addım şirkətin illərdir davam edən rəqabət strategiyasının bir hissəsidir.
Samsung-un "Apple"-ı hədəf alan reklamları ilk dəfə deyil ki, gündəmə gəlir. Daha əvvəl "Galaxy Note 8" reklamında "iPhone"-un ekran kəsiyinə bənzər saç düzümü olan istifadəçilərə, "Ingenius" seriyasında isə "Apple"-ın "Genius Bar" dəstək xidmətinə ironik yanaşmalar edilmişdi. 2024-cü ildə isə şirkət "Apple"-ın mübahisəli "Crush" reklamına cavab olaraq, yaradıcılığın məhv edilə bilməyəcəyini vurğulayan xüsusi çarx hazırlamışdı.
