"Wired" nəşrinin hesabatında "OpenAI" şirkətinin kodlaşdırma modelinə qoblinlər, qremlinlər, yenotlar, trollar, oqrelər, göyərçinlər və digər heyvanlar barədə danışmamaq barədə təlimat verdiyi məlum olduqdan sonra, süni intellekt startapı öz veb-saytında rəsmi izahat dərc edib. Şirkət bu məxluqlara edilən istinadları modellərin təlim prosesi nəticəsində inkişaf etdirdiyi qəribə vərdiş adlandırıb.
Bloq yazısında qeyd edildiyi kimi, "OpenAI" qoblinlər və digər məxluqlara istinad edən metaforaları ilk dəfə "GPT-5.1" modelində, xüsusən də "Nerdy" şəxsiyyət rejimindən istifadə edərkən müşahidə etməyə başlayıb. Şirkət bildirir ki, bu problem sonrakı model buraxılışlarında daha da pisləşib. Məlum olub ki, gücləndirilmiş təlim (reinforcement training) "Nerdy" şəxsiyyətindəki qeyri-adi metaforaları mükafatlandırıb və yeni modellər məhz bunun əsasında təlim keçib. Bir üslub vərdişi mükafatlandırıldıqdan sonra, xüsusən də bu nəticələr nəzarət edilən incə tənzimləmə (fine-tuning) məlumatlarında yenidən istifadə edildikdə, sonrakı təlimlər onu başqa yerlərə yaya və ya gücləndirə bilər.
Mart ayında "OpenAI" tərəfindən "Nerdy" şəxsiyyət rejimi ləğv edildikdən sonra qoblinlərə və qremlinlərə istinadlar azalsa da, "Codex" kodlaşdırma alətinin daxilindəki "GPT-5.5" modelində tamamilə yoxa çıxmayıb. Bunun səbəbi şirkətin əsas problemi tapmazdan əvvəl modelin təliminə başlaması olub. Nəticədə şirkət "Codex" modelinə mifik məxluqlar barədə danışmamaq üçün çox xüsusi təlimatlar vermək məcburiyyətində qalıb. Lakin süni intellektin kod yazarkən qoblinlərdən bəhs etməsini istəyən istifadəçilər üçün "OpenAI" bu təlimatları ləğv etməyin yolunu da paylaşıb.
