"HMD Global" şirkəti sadə və davamlı cihaz axtaran istifadəçilər üçün nəzərdə tutulmuş "Nokia 123 Shield" düyməli telefonunu elan edib. Cihazın əsas üstünlüyü IP65 sertifikatına malik korpusudur ki, bu da onu tozdan, qumdan və yağışdan effektiv şəkildə qoruyur. Lakin qeyd etmək lazımdır ki, telefon tamamilə suya davamlı deyil.
İstehsalçı qiyməti aşağı saxlamaq məqsədilə cihazda LTE və 5G şəbəkə dəstəyindən imtina edib. Bunun əvəzində "Nokia 123 Shield" daha keyfiyyətli siqnal qəbulunu təmin edən təkmilləşdirilmiş antena ilə təchiz olunub. Telefon 1750 milliamper-saat tutumlu batareya ilə təchiz edilib və USB-C portu vasitəsilə enerji toplayır. Rəsmi məlumatlara görə, cihaz gözləmə rejimində 19 gün, danışıq rejimində isə 27,9 saata qədər işləyə bilir.
Texniki göstəricilər baxımından model 2,4 düymlük 320x240 piksel təsvir ölçülü ekran, Unisoc SC6531E prosessoru, 4 MB operativ və 4 MB daxili yaddaşla təchiz olunub. Musiqi həvəskarları üçün 32 GB-a qədər microSD kart dəstəyi, 3,5 mm-lik qulaqlıq girişi və Bluetooth mövcuddur. Həmçinin, arxa paneldə "Nokia 110" ilə müqayisədə üç dəfə daha parlaq olan LED fənər yerləşdirilib.
Cihazın çəkisi 108 qram, qalınlığı isə 15 mm təşkil edir. Hələlik satış tarixi və rəsmi qiyməti açıqlanmasa da, Bolqarıstanın pərakəndə satış mağazalarında modelin təxmini qiyməti 36 avro olaraq göstərilir.
