Rusiyanın yarımkeçirici məhsullar istehsalçısı "Mikron" şirkəti alıcılar üçün əlçatan olan suvenirlər sırasını genişləndirib. Yeniliklər arasında üzərində 30 min ilə 120 min arasında çip yerləşən 200 mm-lik silisium lövhələr və təmiz istehsalat otağından (TİO) götürülmüş hava ilə dolu sınaq şüşələri yer alır. Həqiqi silisium lövhələr xüsusi çərçivələrə yerləşdirilib və ümumilikdə 12 fərqli dizayn variantında təqdim edilir. Hər bir belə suvenirin qiyməti 12 500 rus rublu təşkil edir.
Şirkətin rəsmi saytında verilən məlumata görə, suvenir lövhələri məhdud sayda buraxılıb ki, bu da onların dəyərini daha da artırır. Nümunələr arasında 2022-ci ildən etibarən "Mikron" tərəfindən istehsal edilən və "RISC-V" arxitekturasına əsaslanan "AMUR MIK32" çipli lövhələri də tapmaq mümkündür. Şirkət nümayəndələri məhsulu belə təsvir edirlər:
"Bu suvenir yüksək texnologiyaların orijinal simvoludur. Lövhələrin sayının məhdud olması onları kolleksiyaçılar və elm həvəskarları üçün daha da dəyərli edir. Bu unikal lövhəni kolleksiyanıza əlavə edin və qabaqcıl texnologiyalar dünyasına toxunun."
Potensial alıcılara ağ və qara çərçivələr, həmçinin fərqli naxışlara malik variantlar arasında seçim etmək imkanı verilir. Lakin sifariş zamanı lövhənin üzərində məhz hansı çip dəstinin olacağı əvvəlcədən bilinmir. Çərçivənin aşağı hissəsində "2026 | Rusiyada istehsal olunub | Texno-eksklüziv | Rusiya çipləri | 200 mm" başlığı və digər məlumatlar əks olunan cədvəl mövcuddur.
Bununla yanaşı, "Mikron" təmiz istehsalat otağından yığılmış hava ilə dolu sınaq şüşələrinin də satışına başlayıb və onların hər birinin qiyməti 155 rus rublu olaraq müəyyənləşdirilib. Əlavə olaraq, şirkətin saytında fincanlar və maqnitlər kimi digər ənənəvi suvenir məhsullarını da əldə etmək mümkündür.
