"Windows Central" nəşrinin məlumatına görə, "Microsoft" şirkəti yaxın aylarda yeni "Surface Pro" və "Surface Laptop" modellərini bazara çıxarmağa hazırlaşır. İlk mərhələdə cihazların "Intel Core Ultra 3" çipləri ilə təchiz edilmiş versiyaları, bu yay isə "Qualcomm Snapdragon X2" prosessorlu variantları təqdim olunacaq. Gecikmənin əsas səbəbi kimi "Qualcomm" çiplərinin qıtlığı göstərilir.
OLED ekran və texniki göstəricilər
Yeni "Surface Laptop" seriyasının ən diqqətçəkən yeniliyi OLED ekran seçimidir. Lakin bu texnologiya yalnız yüksək qiymətli modellərdə əlçatan olacaq, baza versiyaları isə ənənəvi IPS panellərlə təchiz ediləcək. Həmçinin, bəzi modellərin daha yüksək ekran həllolma qabiliyyətinə malik olacağı gözlənilir.
Yaddaş böhranının mövcud cihazların qiymətinə təsir etməsinə baxmayaraq, yeni modellərin 16 GB RAM və 256 GB daxili yaddaşla başlayacağı ehtimal olunur. Bu cihazlar "Apple" şirkətinin 599 ABŞ dolları dəyərindəki "MacBook Neo" modeli ilə rəqabət aparmaq əvəzinə, premium seqmentdə qalmağa davam edəcək.
Təkmilləşdirilmiş toxunma reaksiyası
"Microsoft" həmçinin yeni "Surface" modellərində haptik (toxunma) sistemini yeniləyir. Bu yenilik "Windows 11" əməliyyat sistemindəki son dəyişikliklərlə üst-üstə düşür. İstifadəçilər "PowerPoint" proqramında obyektləri hizalayarkən, pəncərələri yerləşdirərkən və ya bağlama düyməsinin üzərinə gələrkən xüsusi toxunma reaksiyalarını hiss edə biləcəklər.
Şirkət adətən özünün "Surface" xəttini may və ya iyun aylarında yeniləyir. Bu səbəbdən, yaxın vaxtlarda yeni noutbuk və planşetlər barədə rəsmi detalların açıqlanacağı gözlənilir.
