"Honda" şirkəti növbəti maliyyə ilindən etibarən, yəni 1 aprel 2026-cı il tarixindən başlayaraq, elektrikli nəqliyyat vasitələrinin hərəkət zamanı simsiz enerji ilə doldurulması texnologiyasını sınaqdan keçirəcək. "Wireless Power Transfer" (WPT) adlanan bu sistem elektromaqnit induksiyası prinsipi əsasında işləyir. Layihə çərçivəsində yolun asfalt örtüyünə xüsusi enerji ötürücü konturlar yerləşdiriləcək.
Bu texnologiya necə işləyir?
Texnologiyanın inkişafı üçün "Honda" şirkəti 2021-ci ildən bəri araşdırmalar aparır. "Taisei Corporation" və "Taisei Rotec Corporation" ilə əməkdaşlıq çərçivəsində şirkət həm yüngül minik avtomobillərini, həm də 20 tonadək ağırlığı olan ağır yük maşınlarını enerji ilə təmin etməyi hədəfləyir. "Honda" avtomobilin altına yerləşdirilən kompakt qəbuledici modulun, "Taisei" isə yol infrastrukturunun və ötürücü konturların qurulmasına cavabdehdir.
Sınaqlar hansı şəraitdə aparılacaq?
Təcrübə üçün Yaponiyada 55,7 km uzunluğunda olan sürətli magistral yolun bir hissəsi seçilib. Sistemin davamlılığını yoxlamaq üçün hər təkərə 49 kN yük düşmək şərtilə bir milyon dəfə təsir testi planlaşdırılır. Yük maşınları üçün sistemin 150 kVt gücündə enerji ötürməsi nəzərdə tutulur ki, bu da nəqliyyatın dayanmadan uzun məsafələr qət etməsinə imkan verəcək.
