"Android Authority" tərəfindən aparılan tədqiqatlar nəticəsində "Google" şirkətinin "Gemini" süni intellekti üçün yeni imkanlar hazırladığı məlum olub. Hazırda yalnız biznes zəngləri üçün nəzərdə tutulan "Call for Me" funksiyasının yaxın gələcəkdə dostlar və ailə üzvləri ilə ünsiyyət üçün də istifadə ediləcəyi gözlənilir. APK faylları üzərində aparılan araşdırmalar zamanı "Gemini Calling" adlı yeni təqdimat ekranı aşkar edilib.
Aşkar edilmiş məlumatlara görə, istifadəçilər "Anama zəng et və 15 dəqiqə gecikəcəyimi de" və ya "Cona zəng et və şam yeməyinə gəlib-gəlməyəcəyini soruş" kimi tapşırıqları süni intellektə həvalə edə biləcəklər. Bu funksiya tam bir söhbəti əvəz etməsə də, qısa məlumatların çatdırılması üçün olduqca effektiv vasitəyə çevrilə bilər. Xüsusilə, mesajlara gec cavab verən və ya stasionar telefondan istifadə edən şəxslər üçün bu yenilik böyük rahatlıq yaradacaq.
Bundan əlavə, "Google" tətbiqlər üçün daha ətraflı icazə parametrləri üzərində işləyir. İstifadəçilər "Gemini" süni intellektinin hansı tətbiqlərə giriş edə biləcəyini özləri müəyyən edəcək və hətta avtomatik zənglərin qəbulundan imtina etmək imkanına sahib olacaqlar. Lakin qeyd etmək lazımdır ki, şirkət hələlik bu funksiyaların rəsmi buraxılışı ilə bağlı yekun qərar verməyib.
