“Google” şirkətinin süni intellekt bölməsi olan “Google DeepMind”-də çalışan Robert O'Kallahan öz istəyi ilə işdən çıxdığını açıqlayıb. O, komandası ilə birlikdə süni intellektin emal sürətini artırmaq və xərclərini azaltmaq üçün çiplərin hazırlanması üzərində işləyirdi. Lakin mühəndis bu texnologiyanın hazırkı inkişaf tempini təhlükəli hesab etdiyini bildirib.
Öz şəxsi bloqunda istefa məktubunu paylaşan O'Kallahan, gördüyü işin nəticələrinə göz yuma bilmədiyini vurğulayıb. O, süni intellektin daha ucuz və sürətli hala gətirilməsinin hazırkı mərhələdə insanlığa fayda verməyəcəyinə əmin olduğunu qeyd edib. Mühəndis, xüsusilə “ASI” (süni superintellekt) yaratmağa yönəlmiş qlobal səyləri “məsuliyyətsiz” adlandırıb.
Süni intellekt sahəsində narahatlıqlar artır
Robert O'Kallahan bu sahədə narahatlıqlarını dilə gətirən ilk mütəxəssis deyil. Son dövrlərdə “Anthropic” şirkətindən Ceykob Kokson və “Google DeepMind”-in keçmiş tədqiqatçısı Bilal Çuqtay da oxşar səbəblərlə istefa veriblər. Mütəxəssislər süni intellektin nəzarətdən çıxaraq bəşəriyyət üçün fəlakətə yol aça biləcəyi ehtimalından ciddi narahatlıq keçirirlər.
Buna baxmayaraq, O'Kallahan süni intellektin yaratdığı risklərin 100% fəlakətlə nəticələnəcəyinə inanmadığını, lakin riskin real və qeyri-müəyyən olduğunu bildirib. O, texnologiya şirkətlərinin bu mövzuda xəbərdarlıq edən əməkdaşlarının səmimiyyətinə inandığını və heç kimin bu məsələni sadəcə rəqabət üçün qabartmadığını qeyd edib. Mühəndis gələcəkdə süni intellekt agentləri üzərində araşdırmalarını davam etdirməyi planlaşdırır.
