Musiqi alətləri və aksesuarları istehsal edən "D’Addario" şirkəti, reklam çarxlarından birində süni intellekt texnologiyalarından istifadə etdiyini təsdiqləyib. Uzun müddət iddiaları inkar edən və texniki nasazlıqlar kimi müxtəlif bəhanələr gətirən şirkət, nəhayət, "Suno Studio" platformasının tətbiq edildiyini etiraf edib. Bu etiraf, sosial şəbəkələrdəki tənqidlərdən və istifadəçilərin topladığı sübutlardan sonra baş verib.
Şirkətin 29 iyul tarixli paylaşımında edilən yeniləmədə, "Biz bu məsələdə səhv etdik. Tam araşdırma apardıq və orijinal musiqi parçasının yenidən yaradılması üçün 'Suno Studio'-dan istifadə olunduğunu təsdiqlədik" ifadələri yer alıb. "D’Addario" həmçinin tənqidi şərhlərin silinməsi və istifadəçilərin bloklanması ilə bağlı hərəkətlərinə görə üzr istəyib.
Bu qalmaqal necə başladı?
Mübahisələr şirkətin geniş diapazonlu gitara telləri üçün hazırladığı reklam videosu ilə başladı. İzləyicilər videodakı səsin süni intellekt tərəfindən yaradıldığından şübhələnərək dərhal etirazlarını bildiriblər. Şirkətin "Logic" proqramında qeyd sessiyalarını nümayiş etdirmək cəhdi isə vəziyyəti daha da gərginləşdirib, çünki videodakı yekun səs ilə proqramdakı fayllar arasında ciddi fərqlər aşkar edilib.
Gitaraçı və YouTuber Rhett Shull-un orijinal faylları təhlil etməsi, "Suno"-nun prosesin bir hissəsi kimi istifadə edildiyini demək olar ki, sübut edib. Hadisədən sonra "D’Addario" gələcəkdə bütün yaradıcı tərəfdaşlarından süni intellekt istifadəsi barədə məlumat verməyi tələb edəcəyini və istehsal prosesinə nəzarəti gücləndirəcəyini açıqlayıb.
