Çinin "Zijin Longking" şirkəti ölkənin ən böyük yükdaşıma qabiliyyətinə malik tam elektrikli karxana özüboşaldan maşını olan "ZL230E" modelinin istehsalına başlayıb. 10 avqust tarixində Futszyan əyalətinin Lunyan şəhərində konveyerdən çıxan bu nəhəng texnikanın ümumi çəkisi 350 ton, öz çəkisi isə 120 tondur. Maşın 125 kubmetr həcmində süxur daşıma imkanına malikdir və əsasən ağır karxana şəraitində fasiləsiz iş üçün nəzərdə tutulub.
Bu texnologiya necə işləyir?
"ZL230E" hər biri 800 kVt gücündə olan iki elektrik mühərriki ilə hərəkətə gətirilir ki, bu da ümumilikdə 1,6 MVt və ya təxminən 2175 at gücü deməkdir. Mərkəzi paylanmış müstəqil ötürücü sxemi sayəsində elektronika gücü körpülərə real vaxt rejimində tənzimləyərək dik yamaclarda yüksək dartma qüvvəsini təmin edir. Avtomobilin enerji təchizatı 1400 kVt•saat tutumlu akkumulyator bloku vasitəsilə həyata keçirilir. Xüsusi sürətli enerji doldurma sistemi vasitəsilə batareyanı 10%-dən 90%-ə qədər doldurmaq cəmi 25 dəqiqə vaxt aparır.
Hansı əlavə imkanlar mövcuddur?
Avstraliyanın "EACON" şirkəti ilə əməkdaşlıq çərçivəsində maşın süni intellektə əsaslanan maşın görmə platforması ilə təchiz edilib və pilotsuz rejimdə işləyə bilir. Təhlükəsizlik üçün gücləndirilmiş çərçivə, dublikat şassi idarəetmə sistemləri və çoxsəviyyəli əyləc rezervasiyası tətbiq olunub. Qeyd edək ki, bu sahədə rəqabət aparan "BELAZ" şirkəti də 2024-cü ildə 120 tonluq "BELAZ-7513E" modelini təqdim etmiş və gələcəkdə daha güclü modellər üzərində işlədiyini açıqlamışdı.
