Martın son günündə Çinin Uhan şəhərində "Baidu" şirkətinə məxsus onlarla "Apollo Go" robotaksisi marşrutun ortasında qəfil dayanıb. Nəticədə sərnişinlər avtomobilləri tərk edərək gediş-gəlişli küçələrdə yola çıxmaq məcburiyyətində qalıb və ciddi təhlükə ilə üzləşiblər. Bu kütləvi nasazlıq Çin hakimiyyətini ciddi şəkildə narahat edib və ölkə ərazisində pilotsuz taksi fəaliyyəti üçün yeni lisenziyaların verilməsi müvəqqəti olaraq dayandırılıb.
İnsidentdən dərhal sonra Çin tənzimləyiciləri eksperimental pilotsuz taksilərin istismar edildiyi şəhərlərin rəsmiləri ilə görüşlər keçirib. Yerli məmurlara bu cür xidmətlərin təhlükəsizlik auditini müstəqil şəkildə aparmaq və gələcək problemlərin qarşısını almaq üçün monitorinqi gücləndirmək tövsiyə olunub. Lisenziyaların dayandırılması qərarı mövcud avtonom taksi parklarına yeni avtomobillərin əlavə edilməsini, yeni marşrutların açılmasını və xidmətin digər şəhərlərə genişləndirilməsini qeyri-mümkün edir.
Bu, "Baidu" şirkətinin fəaliyyəti ilə əlaqədar Çində robotaksi lisenziyalarının verilməsinin dayandırıldığı ikinci haldır. Yüzdən çox avtomobilin fəaliyyətinə təsir edən mart nasazlığının səbəbləri barədə şirkət hələ də rəsmi açıqlama verməyib. Hazırda "Apollo Go" Çinin ondan çox şəhərində yüzlərlə robotaksi idarə edir, lakin Uhan şəhərindəki fəaliyyət səbəblər aydınlaşana qədər tamamilə dayandırılıb.
Rəqib "Pony AI" və "WeRide" şirkətləri isə Çin ərazisindəki pilotsuz taksi parklarının normal rejimdə işləməyə davam etdiyini bildiriblər. Hətta "Pony AI" daha iki yeni şəhərdə robotaksi xidmətini işə salmağa hazırlaşır. Xatırladaq ki, 2024-cü ilin sonunda Uhan şəhərində taksi sürücülərinin etirazları səbəbindən lisenziyaların verilməsi bir neçə aylıq dayandırılmışdı, lakin həmin fasilənin "Apollo Go" avtonom nəqliyyat vasitələrinin təhlükəsizliyi ilə heç bir əlaqəsi yox idi.
