ABŞ bazarında "CD" disklərə olan tələbat gözlənilməz şəkildə artmağa başlayıb. "Luminate" analitik şirkətinin məlumatına əsasən, 2026-cı ilin ilk altı ayı ərzində 16,3 milyon ədəd kompakt-disk satılıb ki, bu da ötən ilin eyni dövrü ilə müqayisədə 16% artım deməkdir.
Satışların artmasına təsir edən əsas amillər arasında disklərin münasib qiyməti, kolleksiyaçılıq həvəsi və "K-pop" janrının, xüsusilə "BTS" qrupunun yeni albomlarına olan yüksək maraq dayanır. Hətta "K-pop" satışları nəzərə alınmasa belə, bazarın 6,7% artım nümayiş etdirdiyi müşahidə olunur.
Nə üçün insanlar pleyeri olmayan diskləri alırlar?
Tədqiqatlar göstərir ki, "Z nəsli" və "milleniallar"ın təxminən yarısı CD-ləri musiqi dinləmək üçün deyil, birbaşa sevdikləri sənətçilərə dəstək olmaq və kolleksiya toplamaq üçün alırlar. Bu tendensiya formatın sadəcə səs daşıyıcısı olmaqdan çıxıb, əlçatan bir "fan-atributuna" çevrildiyini sübut edir.
Ümumilikdə fiziki musiqi daşıyıcıları bazarında müsbət dinamika davam edir. "Vinil" valları, "CD" və kasetlərin ümumi satışı il ərzində 7,8% artıb. Hesabat dövründə 21,8 milyon vinil və təxminən 205 min kaset satılsa da, vinil plastikləri satış həcminə görə liderliyini qoruyub saxlayır.
