ABŞ-ın İstehlak Mallarının Təhlükəsizliyi Komissiyası (USCPSC) və "Casely" şirkəti 5000 mAh tutumlu "Power Pods" simsiz şarj cihazlarının geri çağırılmasını yenidən elan edib. Bu qərar cihazların həddindən artıq qızması ilə bağlı əlavə 28 şikayətdən sonra qəbul edilib. Bildirilir ki, yeni hesabatlara təyyarədə baş vermiş ciddi insident və Nyu-Cersidən olan 75 yaşlı qadının ölümü daxildir. USCPSC-nin məlumatına görə, partlayış nəticəsində ikinci və üçüncü dərəcəli yanıq xəsarətləri alan qadın, sonradan yaranan fəsadlar səbəbindən həyatını itirib.
Şirkət ilk dəfə 2025-ci ilin aprelində 429 mindən çox cihazı geri çağırmışdı. Həmin vaxt litium-ion batareyaların "həddindən artıq qızması, şişməsi və ya alışması" ilə bağlı 51 müraciət qeydə alınmış və altı nəfər yüngül yanıq xəsarəti almışdı. Təhlükəli power banklar 2022-ci ilin martından 2024-cü ilin sentyabrınadək "Casely" veb-saytı, "Amazon" və digər onlayn mağazalarda 30 və 70 ABŞ dolları arasında satılıb. Bu cihazları ön hissəsindəki "Casely" loqosu və arxa tərəfindəki E33A model nömrəsi ilə tanımaq mümkündür.
"Casely" zərərçəkmiş müştərilərə pulsuz əvəzləmə təklif edir. Bunun üçün şirkətin saytında cihazın model nömrəsini, həmçinin üzərində silinməz markerlə "recalled" (geri çağırılıb) sözü və tarix yazılmış ikinci bir fotoşəkli təqdim etmək lazımdır. İstehlakçılara "Power Pods" cihazlarının istifadəsini dərhal dayandırmaq və onları litium-ion batareyalar üçün nəzərdə tutulmuş yerli tullantı məntəqələrinə təhvil vermək tövsiyə olunur. Yanğın və partlayış riski səbəbindən bu cihazları adi zibil qutularına və ya elektronika mağazalarındakı köhnə batareya qutularına atmaq qəti qadağandır.
