Elmi məqalələrin ən böyük açıq arxivlərindən biri olan "arXiv", süni intellekt (İİ) tərəfindən yaradılan və "neyroslop" adlandırılan aşağı keyfiyyətli materialların həddindən artıq artması səbəbindən ciddi tədbirlərə əl atıb. Platformanın redaksiya-məsləhət şurasının sədri Tomas Ditterix bildirib ki, könüllü moderatorların iş yükü həddindən artıq artdığı üçün yeni qaydalar qaçılmaz olub. İndi hər bir tədqiqatçı ay ərzində ən çox iki elmi iş təqdim edə bilər və eyni vaxtda baxılma mərhələsində olan aktiv müraciətlərin sayı üçdən çox ola bilməz.
Nə üçün bu məhdudiyyətlər tətbiq edilir?
Platformanın statistikasına görə, 2016-cı ilin sentyabrında 9 869 müraciət qeydə alındığı halda, 2024-cü ildə bu rəqəm 20 569-a, 2026-cı ilin sentyabrında isə 40 363-ə çatıb. Xüsusilə "Kompüter elmləri" kateqoriyasında müraciətlərin sayı son iki ildə altı dəfə artıb. Bu artım böyük dil modellərindən istifadə edərək avtomatik məqalə yazan və eyni tədqiqatı müxtəlif formalarda təkrar təqdim edən şəxslərlə bağlıdır.
"arXiv" İİ-dən istifadəyə necə yanaşır?
"arXiv" rəsmiləri bildirirlər ki, süni intellektin köməkçi vasitə kimi istifadəsi qadağan deyil, lakin bu fakt mütləq açıqlanmalı və işin elmi əhəmiyyəti yüksək olmalıdır. Yeni qaydalar moderatorların iş yükünü balanslaşdırmaq və keyfiyyətsiz kontentlə mübarizə aparmaq məqsədi daşıyır. Xatırladaq ki, platforma daha əvvəl də İİ tərəfindən yaradılan aşağı keyfiyyətli materiallar üçün bir illik bloklanma cəzası və yeni müəlliflər üçün tövsiyə tələbi kimi sərt addımlar atmışdı.
