"Apple" şirkəti komponent və RAM çatışmazlığı səbəbindən bahalaşan texnologiya bazarında yeni bir addım atır. "Bloomberg"dən Mark Gurmanın verdiyi məlumata görə, şirkət avtomobil lizinqinə bənzər yeni "Apple Upgrade" proqramını təqdim etməyə hazırlaşır. Bu sistem istifadəçilərə cihazı müəyyən müddətdən sonra yenisi ilə əvəz etmək, onu saxlamaq və ya geri qaytarmaq seçimi təqdim edəcək.
Yeni proqramın maliyyə tərəfdaşı qismində "Klarna" çıxış edəcək və qeydiyyat zamanı istifadəçilərdən yumşaq kredit yoxlaması tələb olunacaq. 28 iyul tarixində istifadəyə verilməsi gözlənilən bu təşəbbüs, mövcud "iPhone Upgrade Program" və standart maliyyələşdirmə sistemlərini əvəz edəcək. Proqram çərçivəsində "iPhone" və "Apple Watch" üçün 24 aylıq, "iPad" və "Mac" cihazları üçün isə 36 aylıq lizinq müqavilələri təklif ediləcək.
Hansı cihazlar proqrama daxil edilməyəcək?
Bütün yeni cihazlar bu imkandan yararlana bilməyəcək. İlkin məlumatlara görə, baza "iPad", "iPhone 16", "Apple Watch SE" və "MacBook Neo" kimi büdcə dostu modellər proqramın əhatə dairəsindən kənarda qalacaq. Bundan əlavə, hazırkı "iPhone Upgrade Program"dan fərqli olaraq, yeni sistemə "AppleCare" abunəliyi daxil edilməyəcək.
Bu yenilik "Apple"ın demək olar ki, bütün məhsullarının qiymətini artırmasından cəmi bir ay sonraya təsadüf edir. Hələlik "iPhone" modellərində qiymət artımı müşahidə olunmasa da, ilin sonunda gözlənilən "iPhone 18 Pro" seriyasının daha yüksək qiymətlərlə bazara çıxacağı proqnozlaşdırılır.
