"Apple" şirkəti onlayn mağazasından təhsil endirimi ilə məhsul almaq istəyən ABŞ müştəriləri üçün yeni qaydalar tətbiq edib. Artıq tələbələr, valideynlər və müəllimlər öz statuslarını "Unidays" adlı üçüncü tərəf xidməti vasitəsilə təsdiqləməlidirlər. Bu sistem daha əvvəl Böyük Britaniya daxil olmaqla bir neçə ölkədə fəaliyyət göstərirdi. İndi isə Kanada, Avstraliya, Honkonq, Türkiyə və Çili kimi ölkələrdəki istifadəçilər də bu yeniliklə qarşılaşacaqlar.
Müştərilər akademik statuslarını təsdiqləmək üçün "Unidays" tətbiqi və ya veb-saytı vasitəsilə təhsil müəssisəsinə aid e-poçt ünvanı, fotoşəkilli şəxsiyyət vəsiqəsi və ya digər etibarlı sənəd təqdim edə bilərlər. Fiziki mağazalarda bu cür yoxlamalar onsuz da mövcud idi, lakin onlayn alış-verişdəki boşluqdan istifadə edən şəxslərin qarşısını almaq üçün sistem rəqəmsal platformaya da inteqrasiya edilib. Şirkət bu addımı dörd il əvvəl də sınaqdan keçirmiş, lakin sonradan ləğv etmişdi.
Təhsil proqramındakı digər mühüm yenilik isə ilk dəfə olaraq "Apple Watch" modellərinin endirimli qiymətlərlə təklif edilməsidir. Təhsil sektorundakı müştərilər "Apple Watch Series 11", "Apple Watch SE" və "Apple Watch Ultra 3" saatlarını standart qiymətdən 10 faizədək ucuz əldə edə biləcəklər. Bu dəyişikliklər şirkətin endirim siyasətindən sui-istifadə hallarının qarşısını almaq məqsədi daşıyır.
