"Apple" şirkəti özünün büdcə dostu noutbuku olan "MacBook Neo" üçün yeniləmə üzərində işləyir. Mark Gurman tərəfindən verilən məlumata görə, yeni model hazırda "iPhone 17 Pro" və "iPhone Air" cihazlarında istifadə olunan "A19 Pro" prosessoru ilə təchiz ediləcək. Bu, cari modeldəki "A18 Pro" çipi ilə müqayisədə əhəmiyyətli performans artımı vəd edir.
Texniki yeniliklər bununla bitmir. Prosessor dəyişikliyi ilə yanaşı, noutbukun operativ yaddaşının (RAM) 8 GB-dan 12 GB-a yüksəldiləcəyi gözlənilir. Lakin komponent çatışmazlığı və şirkətin son dövrlərdəki qiymət siyasəti nəzərə alındıqda, yeni "MacBook Neo" modelinin qiymətinin əvvəlkindən baha olacağı ehtimal edilir. Həmçinin, 256 GB yaddaşa malik baza modelinin satışdan çıxarılması da gündəmdədir.
Apple-ın digər planlarında nələr var?
"Apple" yalnız noutbuklarla kifayətlənmir. Şirkət 2024-cü ildən bəri yenilənməyən "iMac" modellərini OLED ekranlarla təchiz etməyi planlaşdırır. Bundan əlavə, "M6 MacBook Pro" və OLED sensor ekranlı noutbukların gələcək aylarda təqdim ediləcəyi barədə şayiələr yayılıb. Gələn il üçün isə "M7" çipi ilə təchiz edilmiş 14 düymlük yeni "MacBook Pro" modelinin bazara çıxarılması gözlənilir.
