"Anthropic" şirkəti tərəfindən hazırlanan "Claude" süni intellekt modeli, gen redaktə mexanizmi olan CRISPR-ə bənzər yeni bir ferment sistemi aşkar edib. Bu kəşf şirkətin yeni yaradılmış biotexnoloji laboratoriyasının ilk elmi nailiyyəti olmaqla yanaşı, həm də süni intellektin elmi tədqiqatlardakı potensialını nümayiş etdirir. "Claude" bu nəticəyə nəhəng DNT verilənlər bazasını analiz edərək çatıb.
Bu kəşf necə baş verib?
Tədqiqat prosesində 950-yə yaxın "Claude" agenti cəmi 21 saat ərzində 210 milyon tokeni emal edib. Süni intellekt verilənlər massivində qeyri-adi təkrarlanan ardıcıllıqları müəyyən edərək onları insan nəzarəti üçün işarələyib. Nəticədə, bakteriyaları yoluxduran viruslarda — bakteriofaqlarda əvvəllər təsvir olunmamış ferment sistemi aşkarlanıb.
Nə üçün bu kəşf vacibdir?
"Anthropic" mütəxəssisləri bu sistemi CRISPR ilə müqayisə etsələr də, onun gələcəkdə eyni dərəcədə inqilabi təsir göstərib-göstərməyəcəyi hələlik bəlli deyil. Şirkət bu nəticələri həm "Claude" modelinin imkanlarını sübut etmək, həm də elmi ictimaiyyəti öz fəaliyyət istiqamətləri barədə məlumatlandırmaq üçün erkən mərhələdə paylaşmağı qərara alıb. Hazırda bu sistemin funksiyalarının öyrənilməsi istiqamətində laboratoriya tədqiqatları davam etdirilir.
